No quieru callalmi,
no pueu callalmi.
 
Mentrah aiga:
 
Muchachinuh pasandu jambri,
ancianus viviendu'n la probeza,
jombrih y mujerih sufriendu
en'esta biá, toa llena de penah.
 
Politicuh y goblenantih
que no son d'erechah,
tampocu d'ihquielda
la su ideologia es el dineru,
y acabal el su mandatu
con'el arca bien yena.
 
Religionih, qu'a tó crihtu enrean,
con trolah máh grandih que carruh
con cieluh y fueguh de infiernuh
con tó lo que puean
pa qu'asi t'asustih,
pa qu'asi no pueas,
pensal pol ti mesmu,
del mundu qu'abemus,
de lo que mos roban,
de lo que mos quean.
 
Mentrah aiga:
 
Opresion, d'unus pa otrus
La libertá, una chanza
La pá, solu en loh papelih
La josticia, una balanza
Fanaticus, que de to pasan
Gentis, colgas de la boteya
Otrus, felicis con yenar panza.
 
No pueu callalmi, 
no quieru callalmi.
Estu, esta podriu y jiedi
unamonoh toh, hay que arrejuntalsi,
pa jacel una juerza cambiaora
que s'impliqui en cambius empoltantis,
hay que cambial la estoria
de las gerras miserias y jambris.
 
Hay que runchal con lo que sia
el bervu la aza o la escopeta,
es aquí aöndi sebe la ombria
no en el bar elanti ela botella.
 
Es precisu que to estu s'acabi,
que dejemus caunu
d'empujal la nuestra noria,
qu'si arrempujamuh toh a una,
prontu mu prontinu
cambiaremuh la estoria,
y podremus desegir a los politicuh,
que d'una vé cambiin lah cosah,
y si no lo jacin loh sacamuh
de la güena vida y la vicoca.
 
Pa esu hai que jacel esjuerzuh
y tamien sacrificalsi,
creemus una nueva sociedá
aondi to estú, ¡no pasi!
 
(Dialecto castellano extremeño castú)